文艺片  金像奖  水晶熊最佳影片奖  原版剧本  罗启锐  中国香港

　　大耳牛一家子，就在那棵断树旁开桌，父亲干脆坐在断树上，俨然是他的皇帝位。
　　左邻右舍非常稔熟，所有同学： 陈苏女、张银仔、王慕嫦…… 原来都住在附近。
　　小孩们拿着饭碗，逐枱巡回，东家挟一块肉片、西家挟一片云耳，无国界地吃着。
　　王慕嫦母：大耳牛，我今晚蒸水蛋呀，「忽」D涂饭啦！
　　大耳牛：蒸水蛋？ 好呀！
　　远处，字花档老板叫过来。
　　老板：阿Desmond，帮我睇睇封鸡肠，噏D乜东东、莞茜葱？
　　Desmond：好呀。（看信 ）
　　老板娘：（怜爱）真叻仔！ D鸡肠鬈弓弓，只长只短，咁都识睇，虾！
　　王慕嫦母：Desmond老豆，第时你个仔出身，就打跛脚都唔忧啦！
　　父亲：（古肃如故）打跛脚，唔驶买鞋着就真！
　　老板娘：咁你就几时都唔驶买鞋架啦！
　　王慕嫦母：Desmond咁叻仔，阿罗你驶担心？ Desmond，嗬？
　　Desmond一笑，继续看信，但那青春自信的表情，明显地同意。
　　母亲：唉，唔担心个大，都要担心个细架！ 阿大耳牛，好鬼韧皮架！
　　老板娘：唏，咁大嘅拔萃，细嘅都拔萃架啦！
　　母亲：拔萃？ 拔卒就有佢份！
　　众笑，大耳牛仍一旧云地吃着蒸水蛋，吃得一塌胡涂。
　　这时，裁缝店的电话铃响，老裁缝走出来。
　　老裁缝：（高叫）阿Desmond，电话！
　　明显地，人人都爱叫Desmond的英文名，却都叫不准，只把它变成上海音、客家音、潮州音…… 的不同版本。
　　Desmond：唔该，何伯！
　　（向字花老板娘）又系政府信呀，告你开字花，8号出庭！
　　老板娘：啊，咁啫！
　　（呷汤，向众人）哎，D鱼头云汤，甜到不得了呀！ 饮啦喂！
　　众街坊闻言又上，「唏里哗啦」的分盛着鱼头云汤了。
　　
　　第13场
　　时：夏夜
　　景：裁缝店
　　Desmond走进裁缝店，聪明的大耳牛已猜到是Flora打来，八卦地偷听。
　　Desmond：喂，Flora？ 啊…… 好呀，礼拜六吖…… 花园街啰，系呀，嗰度乜嘢热带鱼都有架…… 我梗知啦！ 热带鱼，无人熟得过我！ OK，See you！
　　Desmond高兴地挂线。
　　大耳牛：阿哥，你礼拜六去睇鱼呀？
　　Desmond：系呀。
　　大耳牛：我又去！
　　Desmond：唔得！
　　大耳牛：我要去，我要去！
　　Desmond：都话唔得咯，大人去，细路无得去！
　　大耳牛：（使出杀手锏）我话俾阿爸听，你日日返学唔食晏，储埋D钱买热带鱼！
　　Desmond：嗱，你咪讲呀吓！
　　大耳牛：我系要讲！
　　Desmond无奈，加上一向溺爱这个弟弟，唯有答应。
　　Desmond：…… 好啦好啦！
　　大耳牛：（紧张地）嗱，讲咗算数架，唔准做「臭屁辣」架！
　　Desmond：系啦，唔做「臭屁辣」呀！
　　
　　第14场
　　时：夏夜
　　景：鞋檔/鞋档阁楼
　　一道木楼梯斜斜靠下，通往鞋档的阁楼，父亲扶着梯脚，看着两个儿子往上爬。
　　兄弟俩三级作两的爬，青春活力无限。
　　父亲：一级级呀！
　　兄弟俩：啊！
　　父亲：阿哥，睇住细佬做功课呀！
　　Desmond：得啦，爸！
　　大耳牛：（高兴）好嘢，返北京啦！
　　大耳牛爬上梯顶，推开一扇朝天的木门，月光照下，流泻入鞋档，兄弟俩穿过木门，爬进阁楼。
　　大耳牛：（VO） 呢个阁仔，就系我同阿哥嘅睡房，夜晚黑食完饭，我地就上嚟做功课，同埋玩; 阿哥叫楼下做南海，楼上做北京，不过，呢两个地方，佢其实都无去过……
　　阁楼只有三尺多高，但两兄弟早已习惯，熟练地躺着身子，伸高双腿，把校服脱下，换上牛记笠记。
　　阁楼下，父母开始收档，先放一根门坎在地面，再逐只门放上去，每只门都写上号码： 直一、直二、直三; 横一、横二、横三…… 排列清楚，老老实实。
　　阁楼上，大耳牛开始罚抄，他倒比父母懂得走精面，一手抓着两根铅笔，同时两行两行的写着「我以后听话」，字体歪斜，却又真的事半功倍。
　　旁边的Desmond，亦一边用Slide Rule做功课、一边听着收音机的西曲点唱，同时取出一支结他调校。
　　结他上，刻印着一个校徽，和”Property of Diocesan Boys’ School”几个字。
　　许绮年：（VO Under）Johnny Luciano点俾Jervis Leung，Calcutta Cheung，同埋特别点俾Constantly Lau收听，希望佢留意歌词，而家，我地就一齐欣赏，呢首已经连续三个星期，占本台榜首，由Lotus 所唱出嘅 “Interlude” 啦……
　　大耳牛：阿哥，你仲未还个结他呀？
　　Desmond：还啦还啦，唔系又罚两蚊日啦！（瞄一眼弟弟）做咩呀你？ 又俾边个罚抄？
　　大耳牛：李香琴！
　　Desmond：（笑，望望他的双笔）又双管齐下呀？
　　大耳牛：嘻，「士唛」哩！
　　Desmond：（一边做功课，一边随着电台弹唱 ）
　　Time is like a dream
　　And now for a time you are mine……
　　父亲听见音乐，不满地走至楼梯脚，仰叫上来。
　　父亲：喂！ 做乜一边读书，一边听收音机架？
　　大耳牛：（边罚抄）阿哥话，呢D叫： 双管齐下！
　　母亲：又学埋左右手啦！ 第时大个疴尿开叉嘅！
　　大耳牛：（悄声，问兄）系咪真架？
　　Desmond：傻仔！
　　父母摇头，拿两个儿子没法，继续关门。
　　镜头慢慢升起，由收拾中的两夫妻，到边功课、边嬉玩的两兄弟，逐渐现出整个的草根小区，旧日的深水埗，沉睡在星光闪烁的良夜里……
　　
　　第15场
　　时：夏夜
　　景：金鱼街
　　*无数美丽的热带鱼，天使下凡般，展现眼前。
　　相比起深水埗，灯火通明的旺角金鱼街，完全是海底蓬莱，大耳牛简直看得眉飞色舞。
　　另一边厢的Desmond，正向Flora讲解养鱼心得，及自己向往的名贵品种，愈说愈投入。
　　Desmond： 呢D系接吻鱼，得唔得意呀？
　　Flora：（雀跃）得意呀！ 睇，佢地真系响度Kiss喎！
　　Desmond：佢地唔系Kiss呀，佢地响度打紧交呀！
　　Flora：（奇怪）真系？ 你点知架？
　　Desmond：我响British Council Library 睇过本书，系咁讲。
　　Flora：（失笑）噢…… 等我仲谂得咁浪漫。
　　Desmond：唏，咁自己谂得浪漫，就浪漫架啦！ 睇，呢D大尾孔雀，条条唔同花纹，世上无两条系一样架！
　　Flora：系噃！
　　Desmond：嗱，呢D叫黑礼服，呢D叫蓝天使，呢D叫珍珠蛇皮……
　　Flora：（欣赏）真系好靓呀！
　　Desmond：系呀，不过，好贵架……
　　Flora：（笑，得体地）睇吓之嘛！
　　（扯开话题）咦，呢D又咩嚟架？ 游到「咚隆咚隆」咁开心嘅？
　　Desmond：逢亲鱼都游得好开心架，你知唔知呀？
　　Flora：点解呀？
　　Desmond：因为鱼嘅记忆力好短，最多得三秒钟，所以，佢每次响鱼缸嘅一边游到另一边，游返转头嗰阵，已经不记得自己啱啱至游过，以为又去咗个新地方，咪又好开心咁，「咚隆咚隆」游啰！
　　Flora：（大笑）系咪真架？
　　Desmond：（亦大笑）真架！
　　Flora半信半疑，Desmond言之凿凿，但反正两小无猜，一切真假，也无所谓。
　　缤纷的水世界，叫Flora神为之往，她既崇拜又倾慕地细听着; Desmond神气地继续介绍，毕竟，热带鱼，是他最引以为傲的兴趣和知识。
　　群鱼游曳，音乐Fade up，Full Level的 “Interlude”。
　　歌声：Who knows if it’s real
　　Or just something we’re both dreaming of。
　　What seems like an interlude now
　　Could be the beginning of love……
　　
　　第16场
　　时：夏夜
　　景：鞋档（内/外 ）
　　歌声继续，慢慢在夜幕低垂的深水埗Fade out。
　　夜色中，父亲粗壮的背影，站在鞋档前，遥看着嘉顿酒楼的大钟，七时半了。
　　父亲：（喃喃地）呀，仲有一个骨，两只马骝至放学返。