文艺片  金像奖  水晶熊最佳影片奖  原版剧本  罗启锐  中国香港

　　背景远处，开始传来骚动的声音，有人骑膊马贴大字报，有人跟警察对峙。
　　但一切都跟大耳牛无关，市面再萧条，他却冒签着更多的明星照片，在楼梯口摆卖。
　　大耳牛：（高叫）明星签名相！ 曹达华、于素秋、阿伦狄龙、史提夫麦基，冚把冷都有！ 一毫一张，毫半两张！
　　
　　第33场
　　时：秋夜
　　景：鞋檔附近
　　又是晚饭时间了，大耳牛拿着碗筷，如常的周游列国，开心地走到那、吃到那。
　　忽然，他听见「砰」的一声，回过头来，只见父亲怒冲冲地放下碗筷，瞪着哥哥。
　　大耳牛一怔，知机地走回自家饭桌，乖乖坐下。
　　旁边，母亲担心地拿着哥哥刚发的成绩表，看完又看; 父亲铁青着脸，破口大骂。
　　父亲：你咪以为我唔识英文，就唔知你考成咩衰样！ 我唔识鸡肠，不过我分得出颜色，睇！（抢过成绩表）七科蓝，两科红！
　　Desmond：（一脸的羞愧、愤怒、难以置信 ）……
　　父亲：呢两科咩嚟？
　　Desmond：Chemistry，呀，化学，同历史。
　　母亲：（打圆场）唏，两科啫，老豆，食饭先啦！ 食饱饭，万事好商量……
　　父亲：两科啫！ 两科仲未够呀？ 系咪要等到满江红呀？ 吓！？
　　父亲从未发过如此大脾气，一时间，把母亲的圆场也压住。
　　四周街坊开始静下来，有的乘机教仔，有的窃窃私议，有的居然还隔桌搭口。
　　王慕嫦母：Desmond老豆呀！ 「吔」饭先啦，唔系「吔」咗都无益呀！
　　母亲：（向街坊，一笑遮羞）系啰，嗬！？ 成日食饭时候先闹人，失礼晒呀，真系！
　　父亲：唔系食饭，边有咁齐人呀？
　　母亲：（仍希望解围）咁齐人，咪食饭先啰，开讲有话，齐人就食饭……
　　父亲：食咩饭？ 越大越唔生性，咪鬼读啦！ 俾只铁脚你，跟我学做鞋罢啦！ 再唔系，俾把较剪你，跟你阿伯学剪头发啦！
　　Desmond：（两眼通红，但咬紧唇皮 ）……
　　父亲：枉我个个月咁辛苦，悭埋悭埋D钱俾你，你学校样样嘢几贵，你知唔知！？ 我一到月头，就留定钱俾你带返学，怕你交得迟，俾人睇唔起，你知唔知！？
　　Desmond：（用力地，点一下头 ）……
　　母亲：唔好嘈啰唔好嘈啰，食饭先啦！
　　父亲：食唔落呀！
　　父亲气得吃不下咽，母亲替他倒汤进饭碗。
　　母亲：涂汤啦，系咁意扒两啖啦！ 嚟啦！
　　父亲悻悻地再举筷，心情仍未恢复之际，饼店的伙计余叔走至，肩上还挑着一担嫁女饼。
　　余叔：罗师奶！
　　母亲：噢，余叔，送货呀？
　　余叔： 系呀……（放下嫁女饼）呀，罗师奶……
　　母亲：咩事呀？
　　余叔： 讲起嚟，真唔好意思，你地嗰半份月饼会，两个月无供啦，事头婆叫我嚟睇睇……
　　母亲：半份月饼会？ 我地份月饼会，系一份嚟架噃！
　　余叔：唔系你嗰份月饼会呀，罗师奶，系你个仔嗰份呀！
　　父亲一听，猛地望向Desmond，火上加油。
　　父亲：你自己供咗份月饼会咩？ 吓！？
　　Desmond：无呀！
　　父亲：无？ 人地追到上门啦，你仲唔认？
　　Desmond：我真系无呀，爸！
　　父亲：（举筷就打，Desmond险险避过）衰仔！ 仲唔认！？
　　余叔：（劝止）罗伯，唔好……
　　纷乱中，心思细密的母亲，忽地明白过来。
　　母亲：（难以置信地望向大耳牛）细佬？
　　余叔：…… 系啰！
　　父亲：（一怔，瞪着小儿子）大耳牛，你 -- 自己供咗份月饼会？
　　大耳牛：（怯怯地）半份喳！
　　父亲：岂有此理，一个二个都咁衰！ 大嘅衰，细嘅仲衰！
　　母亲：细佬，你因乜自己供月饼会呀？
　　大耳牛：（委屈地）我想…… 我想自己食晒一盒双黄莲蓉！
　　母亲：你 -- 你边得嚟搵钱供呀？
　　大耳牛：我…… 卖明星相啰。
　　父亲：吓！？ 你卖咩明星相呀？
　　大耳牛：陈宝珠、萧芳芳…… 冯宝宝都有！
　　母亲：吓！ 冯宝宝都卖？ 你唔系话大个要娶冯宝宝做老婆架咩？
　　大耳牛脸一红，「哇」地大哭起来。
　　Desmond虽然自身难保，仍昵爱地搂着弟弟，百般哄慰。
　　Desmond：唔好喊，细佬，唔好喊！
　　大耳牛：（哭个不休）呜…… 我要自己…… 自己食晒一盒双黄莲蓉！
　　Desmond：都话唔好喊咯…… 细佬乖，细佬睇，阿哥都唔喊！
　　Desmond努力安慰弟弟，但大耳牛越哭越厉害，一家子慌乱不已。
　　然后，甚至众街坊也拿着碗筷围拢过来，就事件各抒己见了。
　　没有人知道，在成人的纷乱中，拖着两行眼泪的大耳牛，竟又偷了嫁女饼里的两包红菱酥。
　　毕竟，成人世界的事，对大耳牛来说，依旧只是成人世界的事……
　　Fade out：
　　第34场
　　时：秋日
　　景：圣士提反球场
　　圣士提反球场上，校际田径赛正式举行，各校师生云集：
　　DBS，La Salle，培侨，大同，KGV…… 左、中、右、英学校皆有，旗帜鲜明，煞有介事。
　　Desmond理所当然地代表学校出赛，虽然今天，他看来有点沉默，不过却自信依然，静静的替自己绑牢鞋带。
　　教练如常地替队员按摩，队友如常地传吃葡萄糖粉。
　　Montage： 跳高、跳远、标枪、长短跑…… 青春的争斗，叫人目不暇给。
　　人丛中，大耳牛挂着哥哥那枚金牌，一手一包红菱酥，坐在观众台上，替哥哥打气。
　　他探头四望，不见Flora姐姐，有点纳闷，但仍眼仔碌碌的跟哥哥互相挥手，等待即将来临的胜利。
　　然后，百一米栏开始了，Desmond如常地第一个踏出来，蹲在起步线前，轻盈地试跑。
　　枪声一响，Desmond猛地弹出，两个栏后，已经带前一个身位，大耳牛得戚地笑了。
　　大耳牛：（高叫）阿哥，好嘢！
　　群众：DBS！ DBS！
　　大耳牛：（模仿）DBS！ DBS！
　　但叫声犹未了，大耳牛已惊讶地看见所向无敌的哥哥，撼跌了一个栏，摔在地上！
　　Desmond马上翻身，但其他对手已一个接一个赶到、超前！
　　他奋勇地跃起，要力保不失，却似乎大势已去，有心无力，一脸的葡萄糖粉，今天只令他看来苍白虚弱！
　　更叫大耳牛惊讶的是，哥哥大概拼命要挽回失地，竟在跨最后几个栏时，冒出鼻血来！
　　鲜血在飞转的空气中，惊心动魄地飘散……
　　
　　第35场
　　时：秋夜
　　景：街口石阶/裁缝店（内/外 ）
　　夜幕低垂，落败的Desmond一如往日般，搂着弟弟，踏上回家的石阶。
　　兄弟俩默默无言，看来却更亲近，大耳牛递一包红菱酥给哥哥，Desmond饥饿地啃着。
　　大耳牛：阿哥，你仲有无事呀？
　　Desmond：无，头先挫得太犀利啫…… 唔好话俾阿爸知呀！
　　大耳牛：啊，唔话！
　　Desmond：（抚弟头 ）……
　　大耳牛：（不忿地）阿哥，你头先明明Ya住晒佢地架……
　　Desmond：（涩笑 ）……
　　大耳牛：不过，第三都好吖，你都话第三难攞D嘅？
　　Desmond：…… 我净系想攞第一！
　　大耳牛：不过，赢第三都好吖……
　　Desmond：细佬，你听阿哥讲，第三唔算赢，第二都唔算赢，无论咩比赛，只有第一先算赢！
　　大耳牛：（似明非明）啊……
　　两人走到裁缝店，何伯刚跑出来，一见Desmond，兴冲冲上前。
　　老裁缝：Desmond，啱晒嘞，个女仔打电话嚟呀！
　　Desmond：（想一想，咬牙）唔该晒呀，何伯，我唔听啦。
　　老裁缝：（一愕）平时打开俾你嗰个女仔噃？ 佢今日打咗几次嚟架啦！
　　Desmond：我知，我…… 今日好多功课，唔讲电话啦！
　　老裁缝：噢？
　　老裁缝奇怪地返店内回话，然后，又踉跄地再跑出来。
　　老裁缝：个女仔话，叫你得闲俾电话佢，佢就快要同屋企人移民去美国啦。
　　Desmond：（一怔）噢…… 唔该何伯。
　　老裁缝：唔驶唔该。
　　大耳牛：（纳闷）哥，乜Flora姐姐要走嗱？
　　Desmond：估都估到啦…… 香港而家咁乱，走得嘅，都走啦！
　　第35A场
　　时：秋夜