文艺片  金像奖  水晶熊最佳影片奖  原版剧本  罗启锐  中国香港

　　景：鞋檔 阁楼
　　收音机正在播送新闻，骚动已开始升级。
　　Desmond默默地，忽然停下来。
　　Desmond：细佬！
　　大耳牛：咩呀？
　　Desmond：你借番个金牌俾我先吖！
　　大耳牛：做咩呀？
　　Desmond：你借俾阿哥先啦，我迟D还番个新嘅俾你呀！
　　大耳牛：…… 真系？
　　Desmond：系喎，我实会赢番架喎！
　　大耳牛：嗱，唔准做「臭屁辣」架！
　　Desmond：（肯定地）唔做「臭屁辣」！
　　大耳牛：又好。
　　大耳牛从胸前取下金牌，递给哥哥。
　　
　　第36场
　　时：秋日
　　景：Flora家（内/外 ）
　　山顶大屋的四周，花团锦簇如故，阳光下，Desmond大步走向Flora家。
　　大屋内，到处堆放着收拾中的行李; Flora默默地弹着结他，隐隐约约，原来是 “Interlude” 的变奏。
　　门铃响，Flora走往开门。
　　Desmond：Hi。
　　Flora：（诧异）Desmond！ 点解你……
　　Desmond：（笑）今次我知道，你屋企真正嘅门口响边啦！
　　Flora：…… 你好傻，入嚟坐吖。
　　Desmond：唔坐啦，我知道你就走，嚟同你Say Goodbye之嘛。
　　Flora：噢…… Thank you。
　　Desmond：（取出金牌）送俾你！
　　Flora：（惊喜）多谢…… 你好叻呀，次次都赢！
　　Desmond：唔系，我今次输咗。
　　Flora：噢…… ？
　　Desmond：不过，我下次会赢返！（递过金牌）呢个，当系订！ 就当系我俾你、俾我细佬、同埋俾我自己嘅订！
　　Flora：（心下一甜）好，Desmond，我信你！
　　Desmond：Bye，一路顺风！
　　Flora：…… Bye。
　　Desmond一咬牙，回身便走，没走两步，便听到Flora叫自己。
　　Flora：（OS） Desmond！
　　Desmond转过头来，只见Flora手上，拿着她的结他。
　　Flora：我知道，你其实好唔钟意成日借学校D结他，一直都好想自己有一支 -- Here，送俾你。
　　Desmond：（一愕 ）……
　　Flora：拧去啦，你一向弹得好过我，又一直想自己作曲。
　　Desmond：（感动）多谢……
　　Desmond俯前，今次，想真的吻Flora，但终于还是鼓不起勇气，只是在她的咀唇上，用手指点了一下。
　　Desmond：Bye！
　　Flora：Bye，我一有机会，就会返嚟探你！
　　Desmond：好，我 -- 攞定金牌等你！
　　Flora：Promise？
　　Desmond：Promise。
　　Desmond回身，真的离去了。
　　Flora倚在大门前，目送着Desmond倔强的背影，在薄雾的山路上远去……
　　
　　第37场
　　时：秋夜
　　景：鞋檔附近
　　Desmond的背影，Dissolve到一个火光游离的祭盆，晚饭后的夜里，附近一带的坊众，正在祭祀。
　　祭盆前，祖母亦在喃喃的烧衣，大耳牛帮忙着折衣纸。
　　大耳牛：阿嫲，乜你烧咁多嘢俾阿爷架，佢无咩？
　　祖母：（唏嘘）你阿爷佢，成世人都好苦架！ 唉，做人，好话唔好听，正所谓…… 苦海无边！
　　大耳牛：苦海无边？ 咁…… 阿爷即系响边呀？
　　祖母：（凝望向远方黑暗处）响个海嘅…… 嗰边啰，对面岸啰。
　　大耳牛：对面岸？ 好远架？
　　祖母： …… 话远唔远，话近，又唔近咁啦！
　　大耳牛：噢…… 阿嫲，咁你唔去搵阿爷？
　　祖母：（笑，怔忡地）快啦，阿嫲都嗰头近啦！
　　大耳牛：都系唔好，我唔要阿嫲走！
　　祖母：（慈爱地）你咁挂住嫲嫲咩？
　　大耳牛：系呀！
　　祖母：（叹喟）不过，终有一日，嫲嫲都要走架……
　　大耳牛：嫲嫲唔准走！ 唔准走！
　　祖母： 唉，呢D嘢，唔到嫲嫲话事架。
　　大耳牛：（不舍地依偎着祖母）嫲嫲唔好走……
　　祖母看着祭盆掩映的火光，搂着孙儿，亦有点难过。
　　祖母： 傻仔！
　　大耳牛：…… 咁第时，如果我想见番嫲嫲，有无得见呀？
　　祖母： 好难架…… 好难架……（缅怀）不过，以前嫲嫲个嫲嫲，教过嫲嫲一个方法。
　　大耳牛：咩方法呀？
　　祖母： 佢话，人呀，只要肯放弃最心爱嘅嘢，冚把冷都唔要，掟晒落个苦海，将个苦海填满佢，就可以同亲人重逢……
　　大耳牛：真嘅？ 我唔信！
　　祖母： 我嫲嫲系咁讲架，不过，你要真系舍得，掟晒最心爱嘅嘢至得噃！
　　大耳牛：（半信半疑）真系？……
　　大耳牛稚气地听着，这时，一个街坊烧完衣纸，向空中洒一把又一把的铜币。
　　铜币闪亮，大耳牛跟其他街童们，一哄上前抢拾。
　　孩子们抢拾之际，漫天铜币的夜空中，一辆Pan Am飞机隆隆地划过，往美国飞去。
　　也许，Flora就坐在里面……
　　Fade out：
　　第38场
　　时：秋日（暴风雨 ）
　　景：鞋档（内/外 ）
　　鞋档前的帆帐，扑扑的翻动。
　　镜头拉开，只见台风虎虎，猛烈地吹袭着; 大雨倾盆洒下，街道上萧条无人，父亲与母亲赶紧收拾，准备关门。
　　慌乱间，父亲瞄见Desmond仍待在收音机旁，听着点唱。
　　许绮年：Lotus嘅版本，大家听得多嘞，而家我要为听众Desmond Law，点唱俾佢一位已经离开咗香港嘅朋友Flora Liu听，呢首原装版本，由Timi Yuro所唱出嘅 “Interlude”……
　　Desmond：（坐直身子，精神一振 ）
　　许绮年：不过，响播出之前，节目要暂时中断一下，交俾天文台，播出一段特别报告……
　　Desmond：（失望地躺后）哎……
　　黄南施：天文台响下午四时十分，改挂十号风球，台风贝蒂，正以时速一百七十海浬，从东北偏东，正面吹袭本港……
　　心情本已不佳的父亲，看见儿子的慵懒颓态，不禁怒上心头。
　　父亲：（破口大骂）成日挂住听收音机，打到嚟啦，帮吓手啦！
　　Desmond这才如梦初醒，急忙坐起，替父亲关门。
　　收音机开始播出原装版本的 “Interlude”，歌声沉郁，别有一种成熟的、痛定思痛的沧桑。
　　歌声：Time is a like a dream
　　And now for a time you are mine……
　　Desmond像父亲平时一样，放门坎在地面，再直一、直二; 横一、横二…… 的逐只门放上去，一边听着当日的歌，但觉百般思念，涌上心头。
　　他听着听着，一时拿揑不牢，木门脱手拍向鞋柜，「砰」的一声，差点没把鞋柜给打破。
　　父亲：姐手姐脚！ 系咪未食白粉呀？
　　Desmond：（被抢白，反驳）我一早话咗，D门同条门坎，角度唔夹架啦！
　　父亲：（料不到儿子反唇相稽，更怒）仲驳咀！ 你读书咁叻，就唔驶两科肥佬啦！
　　Desmond：我肥Chemistry同History，唔系肥Geometry！
　　父亲： 唔好同我讲英文！ 最憎人同我讲英文！
　　父子俩忽地吵起来，风势增强，情况更乱; 母亲见势色不对，慌忙介入，却力劝无从。
　　母亲：父子俩，一人少句啦！
　　Desmond：哼，考试嗰日，如果我唔系唔舒服，我会肥！？
　　父亲：唔舒服？ 你姓赖架？
　　Desmond：而家我肥佬，净得你唔开心咩？ 我仲唔开心过你呀！
　　父亲：你想个老豆开心，就打醒精神，唔好成日洽眼瞓，成日游魂……
　　风刮得更劲，鬼哭神号一样，档口四周都摇撼漏水。
　　母亲把脸巾、衣物塞向窗缝门脚，但家中杂物仍尽湿透，一地是水。
　　大耳牛吓至缩在阁楼，面青唇白。
　　大耳牛：阿爸！ 阿妈……
　　母亲：（发脾气）父子俩收声呀！ 风大雨大，夹手夹脚收档罢啦！